فیفا کے صدر جیانی انفینٹینو نے اعلان کیا ہے کہ ایران 2026 کے ورلڈ کپ میں شرکت کرے گا۔ امریکہ کے ساتھ جاری کشیدگی کے باوجود کھیل کو سیاست سے الگ رکھنے پر زور دیا گیا ہے۔
واشنگٹن: فیفا کے صدر جیانی انفینٹینو نے کہاہے کہ ایران، مشرق وسطیٰ میں جاری جنگ کے باوجود، 2026 کے ورلڈ کپ میں ‘یقینی طور پر’ شرکت کرے گا۔ ایران نے مارچ 2025 میں ایشیا کی بہترین ٹیموں میں شامل ہو کر ورلڈ کپ کے لیے کوالیفائی کیا تھا۔ اس کے باوجود، ایران کی شرکت پر سوالات اٹھ رہے تھے کیونکہ امریکہ کے ساتھ کشیدگی عروج پر ہے۔ انفینٹینو نے ایک اقتصادی کانفرنس سے خطاب کرتے ہوئے کہا کہ کھیل کو سیاست سے علیحدہ رکھنا چاہیے اور انہوں نے یقین دلایا کہ ایران یقینی طور پر امریکہ آ رہا ہے۔ انہوں نے امید ظاہر کی کہ ان کی آمد تک حالات میں بہتری آ جائے گی۔
