کویت کے سیکیورٹی حکام نے شہریوں کو عالمی سائبر فراڈ سے بچنے کے لئے محتاط رہنے کی ہدایت کی ہے، جہاں مشتبہ فون کالز میں اضافہ ریکارڈ کیا گیا ہے۔
کویت سٹی: حالیہ دنوں میں، کویت کے شہریوں اور مقیم غیر ملکیوں نے مشتبہ بین الاقوامی فون کالز میں نمایاں اضافہ محسوس کیا ہے۔ سیکیورٹی ذرائع کے مطابق، یہ کالز ایک منظم عالمی سائبر فراڈ کا حصہ ہیں۔ غیر ملکی ذرائع ابلاغ کی رپورٹس کے مطابق، ان کالز میں اکثر ایک گھنٹی بجنے کے بعد فوراً بند ہو جاتی ہیں، جسے عالمی سطح پر ‘وانگیری اسکیم’ (Wangiri Scam) کہا جاتا ہے۔ دھوکہ دہی کرنے والے خودکار کالنگ سسٹمز کے ذریعے ہزاروں نمبروں پر کال کرتے ہیں۔ جب متاثرہ شخص اس کال کو وصول کرتا ہے یا واپس کال کرتا ہے تو اسے مہنگے بین الاقوامی نمبروں پر منتقل کر دیا جاتا ہے، جہاں فی منٹ انتہائی زیادہ چارجز عائد کیے جاتے ہیں۔ حکام نے شہریوں سے درخواست کی ہے کہ وہ ان مشتبہ کالز سے دور رہیں اور محتاط رہیں۔
