برسلز میں معرکہ حق (بنیان مرصوص) کی پہلی سالگرہ، علی رضا سید کا کشمیریوں کی حمایت میں اہم بیان

برسلز (آمن نیوز) یورپی ہیڈکوارٹرز برسلز میں Ali Raza Syed کی زیر صدارت معرکہ حق (آپریشن بنیان مرصوص) کی کامیابی کی پہلی سالگرہ کے موقع پر ایک خصوصی تقریب منعقد ہوئی، جس میں مسئلہ کشمیر، پاکستان کے دفاعی کردار اور کشمیری عوام کی جدوجہد پر تفصیلی گفتگو کی گئی۔

اپنے خطاب میں Ali Raza Syed نے کہا کہ معرکہ حق (بنیان مرصوص) کی کامیابی سے کشمیریوں کے حوصلے بلند ہوئے ہیں اور ان کی آواز عالمی سطح پر مزید مضبوط ہوئی ہے۔ انہوں نے کہا کہ اس تاریخی کامیابی کے بعد مسئلہ کشمیر ایک بار پھر عالمی توجہ کا مرکز بن گیا ہے۔

انہوں نے مزید کہا کہ آپریشن بنیان مرصوص پاکستان کی مسلح افواج کی پیشہ ورانہ صلاحیت، دفاعی طاقت اور قومی سلامتی کے عزم کی علامت ہے، جسے تاریخ میں سنہرے الفاظ میں یاد رکھا جائے گا۔ انہوں نے اس بات پر زور دیا کہ پاکستان کشمیری عوام کا حقیقی وکیل ہے اور اسے عالمی سطح پر مزید مؤثر کردار ادا کرنا چاہیے۔

مقررین نے اس موقع پر کہا کہ بھارت کے زیر قبضہ جموں و کشمیر میں کشمیری عوام گزشتہ کئی دہائیوں سے انسانی حقوق کی سنگین خلاف ورزیوں، سیاسی جبر اور فوجی محاصرے کا سامنا کر رہے ہیں۔ 5 اگست 2019 کے بعد صورتحال مزید سنگین ہو گئی ہے، جب بھارت نے مقبوضہ کشمیر کی خصوصی آئینی حیثیت ختم کر دی۔

تقریب میں اس بات پر زور دیا گیا کہ کشمیری عوام کو اقوام متحدہ کی قراردادوں کے مطابق حقِ خودارادیت دیا جانا چاہیے تاکہ مسئلہ کشمیر کا پرامن اور منصفانہ حل ممکن ہو سکے۔

تقریب سے مختلف سیاسی و سماجی شخصیات نے بھی خطاب کیا اور پاکستان کی سیاسی و عسکری قیادت، فارن آفس اور دیگر اداروں کو معرکہ حق میں کامیابی پر خراج تحسین پیش کیا۔ شرکاء نے کشمیریوں کی جدوجہد کی مکمل حمایت کا اعادہ کیا۔

اس تقریب میں سفارت خانہ پاکستان کے نمائندگان، سیاسی رہنما اور کمیونٹی شخصیات نے شرکت کی، جن میں Sardar Siddique Khan، Chaudhry Imran Saqib، اور دیگر نمایاں شخصیات شامل تھیں۔