سندھ حکومت نے نقل کی روک تھام کے لیے سخت اقدامات کیے ہیں، جن کے تحت نقل کرتے ہوئے پکڑے جانے والے طلبہ کو امتحانات دینے سے مستقل طور پر روک دیا جائے گا۔
سندھ حکومت نے میٹرک اور انٹرمیڈیٹ امتحانات میں نقل کرنے والے طلبہ اور ملوث عملے کے خلاف سخت اقدام اٹھاتے ہوئے مستقل پابندی کا اعلان کیا ہے۔ صوبائی وزیر تعلیم سردار شاہ اور وزیر بورڈز و جامعات محمد اسماعیل راہو نے مشترکہ بیان میں کہا کہ نئی ‘زیرو ٹالرنس پالیسی’ کے تحت نقل کرتے ہوئے پکڑے گئے طلبہ کا مستقبل داؤ پر لگ سکتا ہے۔ یہ فیصلہ نقل کے خلاف اب تک کی سخت ترین حکمت عملی کے تحت کیا گیا ہے، جس کے مطابق ایسے طلبہ پر بورڈ کے امتحانات میں شرکت پر تاحیات پابندی عائد کی جائے گی۔
