کراچی: قائد اعظم ٹرافی کے دوسرے راؤنڈ میں بیٹرز نے بولرز کو تختہ مشق بنالیا، کراچی وائٹس کے کپتان سرفراز احمد کا بیٹ خوب رنز اگلنے لگا، انھوں نے ناقابل شکست سنچری بنائی۔
پنڈی اسٹیڈیم میں میچ کے تیسرے دن کراچی وائٹس نے203 رنز 5 وکٹ سے اننگز کو آگے بڑھایا، سرفراز احمد نے 13 چوکوں اور 2 چھکوں کی مدد سے128 رنز ناٹ آؤٹ بنائے، یہ ان کی 15ویں فرسٹ کلاس سنچری شمار ہوئی،انھوں نے گذشتہ میچ کی دونوں اننگز میں ففٹیز بنائی تھیں۔
اسد شفیق نے108 رنز اسکور ناٹ آؤٹ کی صورت میں اپنی 29 ویں فرسٹ کلاس سنچری بنائی،سرفراز اور اسدنے چھٹی وکٹ کی ناقابل شکست شراکت میں 234 رنز جوڑے، دن کے اختتام پر فیصل آباد نے جوابی اننگز میں 63 رنز پر 6 وکٹیں گنوا دیں، آفتاب ابراہیم نے 14رنز دے کر 3 وکٹیں حاصل کیں۔
Advertisement
یہ بھی پڑھیں: ورلڈکپ اسکواڈ میں سرفراز کی ٹیم میں شمولیت پر آوازیں اٹھنا شروع
قذافی اسٹیڈیم لاہور میں راولپنڈی سے میچ میں لاہور وائٹس نے 3 وکٹ 407 رنز پر اننگز ڈیکلئیرڈ کردی، جواب میں راولپنڈی نے ایک وکٹ پر232 رنز بنا لیے، عبدالفصیح 113 اور اشفاق احمد51 رنز پر ناٹ آؤٹ ہیں، دونوں نے دوسری وکٹ کیلیے 125 کی پارٹنر شپ بنالی، اس سے قبل عبدالفصیح اور حسن رضا نے پہلی وکٹ کے لیے 107 رنزجوڑے تھے۔
شعیب اختر اسٹیڈیم پنڈی میں ملتان سے میچ میں پشاورکی ٹیم پہلی اننگز میں 263 رنزبناکرمیدان بدر ہوگئی، کامران غلام نے 117 رنز بنائے، سراج الدین نے 4 شکار کیے، ایبٹ آباد میں لاہور بلوز کیخلاف فاٹا نے دوسری اننگز میں 4 وکٹ پر 127 رنزبنالیے، سلمان خان 66 رنز کے ساتھ کریز پر ہیں۔
اس سے قبل لاہور بلوز کی ٹیم پہلی اننگز میں 314 رنز بنا کر آؤٹ ہوئی، وقاص احمد53 رنز بناکر نمایاں رہے، قاسم اکرم نے 51 رنزاسکور کیے، عاکف جاوید اور ایمل خان نے 3،3 وکٹیں اڑائیں۔
