کیلیفورنیا: پاکستانی میوزک پروڈیوسر شریف اعوان نے کیلیفورنیا میں منعقد ہونے والے ‘گلوبل میوزک ایوارڈز’ کے تین ایوارڈز اپنے نام کرلیے ہیں، اُنہیں اپنے ‘میوزک اِن کووڈ ٹائمز‘ کے عنوان سے البم میں غیر معمولی پروڈکشن کے لیے ایوارڈز سے نوازا گیا۔
دی ایکسپریس ٹریبیون کے مطابق ‘گلوبل میوزک ایوارڈز’ کلاسیکل، فیوژن، فوک موسیقی میں شاندار فنکارانہ صلاحیتوں کی حوصلہ افزائی کے لیے جانا جاتا ہے اور اب ‘گلوبل میوزک ایوارڈز’ نے پاکستانی میوزک پروڈیوسر شریف اعوان کو اپنے اعلیٰ ترین ایوارڈز سے نوازا ہے۔
تہذیب فاؤنڈیشن کے بینر تلے تیار کیے گئے ‘موسیقی اِن کووڈ ٹائمز’ البم کو گلوبل میوزک ایوارڈ کی جانب سے (Creativity/Originality) کی کیٹیگری، بہترین البم، اور بہترین پروڈیوسر کی کیٹیگری میں ایوارڈز سے نوازا گیا ہے۔
Advertisement
ایسا پہلی بار نہیں ہوا ہے کہ جب تہذیب فاؤنڈیشن کے کام کو بین الاقوامی سطح پر پذیرائی ملی ہو، اس سے قبل سال 2016 کے ‘گلوبل میوزک ایوارڈ’ میں ’انڈس راگ – بیونڈ بارڈرز‘ نے گولڈ میڈل اپنے نام کیا تھا، اس کے علاوہ ’انڈس راگ – بیونڈ بارڈرز‘ نے سال 2015 میں ‘گریمی ایوارڈز’ میں پاکستان کی پہلی انٹری کے طور پر تاریخ رقم کی تھی۔
عالمی سطح پر کامیابی حاصل کرنے والے پاکستانی میوزک پروڈیوسر شریف اعوان نے اپنی خوشی کا اظہار کرتے ہوئے کہا کہ ‘موسیقی کی جیت پر بہت زیادہ خوش ہوں’۔
شریف اعوان نے مزید کہا کہ ‘میں پاکستان، بھارت، جرمنی اور برطانیہ کے اُن تمام فنکاروں کو مبارکباد دیتا ہوں جنہوں نے میرا البم بنانے میں تعاون کیا’۔
