اسلام آباد: شندور پولو فیسٹیول کے فائنل میں چترال نے زبردست مقابلے کے بعد گلگت بلتستان کو 5 کے مقابلے میں 7 گول سے شکست دیدی، تین روزہ فیسٹیول رنگا رنگ تقریبات کیساتھ اختتام پذیر ہوگیا۔
فیسٹیول کے آخری روز بڑی تعداد میں ملکی اور غیر ملکی سیاح پولو میچ سے لطف اندوز ہوئے، اختتامی تقریب میں کور کمانڈر پشاور نے بطور مہمان خصوصی شرکت کی، اس کے ساتھ ساتھ اعلیٰ سول اور ملٹری حکام سمیت مقامی لوگوں کی بڑی تعداد بھی فیئسٹول سے لطف اندوز ہوئی۔
فیسٹیول کے آخری روز اسکول کے بچوں نے ٹیبلو پیش کیا جبکہ فرنٹیئر کور اور گلگت بلتستان کے بینڈز نے قومی نغموں کی دھنیں بجائیں، اس موقع پر مقامی فنکاروں نے بھی اپنے فن کا مظاہرہ کرتے ہوئے وزیرستانی، چترالی، خٹک اور کیلاشی رقص پیش کیا، تقریب میں پیرا گلائیڈرز اور پاک آرمی کے ایس ایس جی کمانڈوز نے پیراٹروپنگ کے ذریعہ حاضرین سے خوب داد وصول کی۔
Advertisement
مہمان خصوصی نے بہترین کارگردگی دکھانے والے کھلاڑیوں، رنراپ اور جیتنے والی ٹیموں کو ٹرافیاں اور نقد انعامات دیئے، اس موقع پر شندور پولو فیسٹول کے فروغ ، سابقہ پولو کھلاڑیوں کی بہبود اور عالمی سطح پر اس فیسٹول کی پذیرائی کیلئے ایک فنڈ قائم کرنے کا اعلان بھی کیا گیا۔
