کراچی: کیپری سینما کو بند کرنے کے حوالے سے سوشل میڈیا پر چلنے والی افواہیں انتظامیہ نے سختی سے مسترد کردی ہیں۔
ایکسپریس نیوز کے مطابق شہر کے واحد ڈیجیٹل سنگل اسکرین کیپری سینما کو تیکنیکی وجوہات کے سبب جمعرات تک بند کیا گیا ہے جبکہ جمعہ کے روز ٹام کروز کی بلاک بسٹرفلم ’مشن امپوسیبل7‘ اور پاکستانی فلم ’جون‘ کی سینما پرنمائش ہوگی۔
کیپری سینما کے جنرل منیجرعزیز خٹک کے مطابق عید قربان کے موقع پر اچانک فلم پروجیکٹرکی مشین میں پیدا ہونے والی تیکنیکی خرابی کے سبب سینما مشینری کی مرمت اور چیکنگ انتہائی ناگزیر تھی، جس کے سبب پیر سے جمعرات تک کیپری سینما کو بند رکھنے کا فیصلہ کیا گیا تا ہم جمعے سے سینما ہال کو دوبارہ کھول دیا جائے گا۔
سینما انتظامیہ کا کہنا ہے کہ کیپری سینما کو بند کرنے کی خبریں بے بنیاد ہیں، یہ کراچی کے شہریوں کے لیے واحد سستی ترین تفریح گاہ ہے جہاں آج بھی 200 روپے کا ٹکٹ دستیاب ہے۔
