کراچی: پاکستانی فلم انڈسٹری کی معروف اداکارہ ممتاز کی کراچی آمد کے موقع پر آرٹس کونسل کراچی میں پاکستان فلم ٹی وی جرنلسٹس ایسوسی ایشن اور آرٹس فاؤنڈیشن کے اشتراک سے ان کے اعزاز میں تقریب منعقد کی گئی۔
اس موقع پر خطاب کرتے ہوئے فلم اسٹار ممتاز نے کہا کہ فلم انڈسٹری میں گزارے ہوئے سنہری دن بہت یاد آتے ہیں، وطن واپس آنے پر کراچی کے لوگوں نے جو محبت اور پیار دیا ہے وہ ناقابل فراموش ہے۔
انہوں نے مزید کہا کہ وہ اپنے بیٹے ذیشان راحیل باری کے ہمراہ پاکستان آئی ہیں اور وہ چاہتی ہیں ذیشان بھی شو بز انڈسٹری میں اپنا نام بنائے۔
مصطفیٰ قریشی نے اظہار خیالات کرتے ہوئے کہا کہ ذیشان خوش شکل اور با صلاحیت ہے، پروڈیوسر کو اس پر توجہ دینا چاہئے، ممتاز بہت اچھی ادا کارہ ہیں اگر انہیں اب بھی فلموں یا ڈراموں کی آفر ہو تو انکار نہ کریں، فنکار کبھی سابق یا ریٹائرڈ نہیں ہوتا۔
تقریب سے منورسعید، افشاں قریشی، گلوکار ارشد محمود، شبانہ کوثر، شازیہ کوثر، بابر عباسی، اطہر جاوید صوفی، وسیع قریشی، پرویز مظہر، اقبال لطیف و دیگر نے بھی اظہار خیال کیا جبکہ نظامت کے فرائض فیصل ندیم نے سرانجام دیئے۔
اس موقع پر لاہور سے بذریعہ فون سید نور، سنگیتا بیگم، ہدایت کار مسعود بٹ کے علاوہ امریکہ سے فلم اسٹار ریما نے بھی ممتاز کو مبادک پیش کی جبکہ جاوید شیخ، غلام محی الدین اور پرویز کلیم نے ویڈیوز پر پیغامات بھیجے۔
