اگلے دو میچز میں بھی اسی طرح کھیلیں گے، بابراعظم

کولکتہ: قومی کرکٹ ٹیم کے کپتان بابراعظم نے بنگلادیش کیخلاف میچ جیتنے کے بعد کہا ہے کہ اگلے دو میچز میں بھی اسی طرح کھیلیں گے، ٹیم کے ابھی آگے جانے کے چانسز برقرار ہیں۔

کولکتہ میں بنگلادیش کیخلاف میچ میں کامیابی کے بعد گفتگو کرتے ہوئے بابراعظم نے کہا کہ معلوم تھا اگر فخرزمان 20 سے 30 اوورز کھیل گیا تو میچ آسانی سے جیت جائیں گے۔ ہم نے شروع سے ہی اچھا آغاز کیا جس کا فائدہ ہوا۔

بابر اعظم نے کہا کہ شاہین نے شروع میں وکٹیں لے کر بنگلادیش کی ٹیم پر پریشر بنایا۔ سارے بولرز نے اپنا سو فیصد دیا ہے۔ واضح رہے کہ پاکستان نے منگل کو اپنے ساتویں میچ میں بنگلادیش کو سات وکٹوں سے شکست دی تھی۔

مزید پڑھیں: ورلڈ کپ؛ مسلسل چار شکستوں کے بعد پاکستان کی بنگلادیش کیخلاف فتح

پاکستان ٹورنامنٹ میں اب تک تین میچز میں ہی کامیاب ہوسکا ہے جبکہ چار میں شکست ہوئی ہے۔ قومی ٹیم اپنا اگلا میچ چار نومبر کو بنگلورو میں نیوزی لینڈ اور آخری گروپ میچ 11 نومبر کو ایڈن گارڈنز میں انگلینڈ کیخلاف کھیلے گی۔

پاکستان کو سیمی فائنل میں پہنچنے کیلئے نہ صرف اپنے اگلے دونوں میچز جیتنا ضروری ہیں بلکہ نیوزی لینڈ اور آسٹریلیا کی آئندہ میچز میں شکست کیلئے بھی دعائیں کرنی ہیں کیونکہ اسی صورت میں پاکستان کی ٹورنامنٹ کے اگلے مرحلے میں رسائی ممکن ہوگی۔

مزید پڑھیں: شاہین شاہ آفریدی نے بنگلادیش کیخلاف میچ میں اہم اعزاز اپنے نام کرلیا

نیوزی لینڈ اور آسٹریلیا اس وقت آٹھ، آٹھ پوائنٹس کے ساتھ بالترتیب تیسرے اور چوتھے نمبر پر ہیں اور دونوں ٹیموں کے ابھی تین، تین میچز باقی ہیں۔

آسٹریلیا کے اگلے تین میچز انگلینڈ، افغانستان اور بنگلادیش سے ہیں۔ دوسری جانب نیوزی لینڈ کے اگلے تین میچز جنوبی افریقا، پاکستان اور سری لنکا سے ہیں۔