کراچی: پاکستانی شوبز انڈسٹری کے معروف اداکار میکال ذوالفقار نے کہا ہے کہ وہ بیٹے کے خواہش مند ہیں اور ان کی یہ خواہش ابھی تک پوری نہیں ہوئی۔
نجی ٹی وی پروگرام میں اداکار میکال ذوالفقار نے اپنی اُن خواہشات کے بارے میں گفتگو کی جو ابھی تک پوری نہیں ہوئیں۔
انہوں نے کہا کہ ویسے ہر کام اور چیز مجھے ملی ہے تاہم اگر خواہشات کی بات کی جائے تو چار خواہشات ایسی ہیں جو ابھی تک پوری نہیں ہوئیں۔
اداکار نے کہا کہ ’مجھے بیٹے کی خواہش تھی جو ابھی تک پوری نہیں ہوئی‘۔
واضح رہے کہ میکال ذوالفقار کی 2010 میں ماڈل سارہ بھٹی سے شادی ہوئی تھی جس کے بعد اُن کے ہاں دو بیٹیوں کی پیدائش ہوئی۔ بعد ازاں مارچ 2017 میں دونوں نے اپنی راہیں جدا کرلیں تھیں۔
اس کے علاوہ انہوں نے کہا کہ وہ ایک اچھا گلوکار بھی بننا چاہتے ہیں لیکن یہ بھی ابھی تک ممکن نہیں ہوسکا۔
اپنی تیسری خواہش کے بارے میں گفتگو کرتے ہوئے انہوں نے کہا کہ وہ ایک دن ہالی ووڈ انڈسٹری کے لیے کام کرنا چاہتے ہیں جبکہ آخری میں انہوں نے بتایا کہ وہ اسکائی ڈائیونگ کرنے کے بھی خواہش مند ہیں۔
