ملک میں بجلی کی بڑھتی ہوئی طلب اور شدید گرمی کے باعث متوقع شارٹ فال کے پیش نظر حکومت نے بجلی کی پیداوار میں اضافے کے لیے اہم فیصلے کیے ہیں۔ پاور ڈویژن نے بجلی گھروں کو فعال رکھنے کے لیے پٹرولیم ڈویژن سے 400 ایم ایم سی ایف ڈی گیس کی فراہمی کی باضابطہ درخواست کی ہے، تاکہ گرمیوں میں بجلی کے بحران پر قابو پایا جا سکے۔
اسلام آباد: ملک میں بجلی کی بڑھتی ہوئی طلب اور آئندہ گرمیوں میں متوقع شارٹ فال کے پیش نظر، حکومت نے بجلی کی پیداوار میں اضافے اور توانائی کے بحران سے نمٹنے کے لیے اہم اقدامات کا آغاز کر دیا ہے۔ ذرائع کے مطابق، پاور ڈویژن نے پٹرولیم ڈویژن کو ایک باضابطہ خط ارسال کیا ہے جس میں بجلی کی بلا تعطل فراہمی یقینی بنانے کے لیے مائع قدرتی گیس (ایل این جی) کی فراہمی کی درخواست کی گئی ہے۔
خط میں پاور ڈویژن نے 400 ایم ایم سی ایف ڈی (ملین مکعب فٹ فی دن) گیس کی فوری فراہمی کی استدعا کی ہے۔ اس کا مقصد ایل این جی پر چلنے والے پاور پلانٹس کو مکمل صلاحیت کے ساتھ فعال کرنا ہے تاکہ بڑھتے ہوئے درجہ حرارت کے باعث بجلی کے شارٹ فال میں نمایاں اضافے سے بچا جا سکے۔ حکام کے مطابق، موجودہ صورتحال میں ایل این جی کی فراہمی انتہائی ناگزیر ہو چکی ہے۔ اگر ایل این جی سے چلنے والے بجلی گھروں کو بروقت فعال نہ کیا گیا تو ملک میں بجلی کا شارٹ فال قابو سے باہر ہو سکتا ہے، جس سے صارفین کو طویل لوڈشیڈنگ کا سامنا کرنا پڑ سکتا ہے۔ ان اقدامات کا مقصد ملک بھر میں بجلی کی ہموار فراہمی کو یقینی بنانا اور معیشت پر منفی اثرات کو کم کرنا ہے۔
